Ковчег с мощами 9 святых
Краткое житие
Память: 28 декабря по старому стилю / 11 января по новому стилю
Святые мученики 14 000 младенцев убиты царем Иродом в Вифлееме. Когда пришло время совершения величайшего события – Воплощения Сына Божия и Рождения Его от Пресвятой Девы Марии, восточные волхвы увидели на небе новую звезду, предвозвещавшую рождение Царя Иудейского. Тотчас они направились в Иерусалим для поклонения Родившемуся, а звезда указывала им путь. Поклонившись Богомладенцу, они не вернулись в Иерусалим к Ироду, как он приказывал им, но, получив откровение свыше, ушли в свою страну иным путем. Тогда Ирод понял, что замысел его найти Младенца не осуществился, и приказал убить в Вифлееме и окрестностях всех детей мужского пола от двух лет и младше. Он рассчитывал, что среди убитых детей будет и Богомладенец, в Котором видел соперника. Погубленные младенцы стали первыми мучениками за Христа.
Акафист
Кондак 1
Избранный соборе мучеников, во младенчестве за Христа пострадавшие, молитися усердно о чтущих святую память вашу и тако вам с любовию вопиющих:
Радуйтеся, мученицы непорочнии, младенцы Вифлеемстии.
Икос 1
Ангельский собор земных ангелов зряще, младенческим незлобием злобу демонскую, чрез Ирода явленную, победивший, умиляемся сердцем, таковая им воспевающе:
Радуйтеся, ангели юдоли земныя:
Радуйтеся, бисери Рождества Христова;
Радуйтеся, зерцала непорочности;
Радуйтеся, благоухание незлобия;
Радуйтеся, мученицы непорочнии, младенцы Вифлеемстии.
Кондак 2
Видяще ваша телеса, яко жертву благоуханную, за Христа пострадавшия, горце родителие ваша и сродницы со слезами воспеваху Богу: Аллилуия!
Икос 2
Разум наш помраченный просветите младенцы святии, да злаго отбегнути навыкнем и ко благому тщание имети будем мы, ныне вас тако славословящия:
Радуйтеся, младенцы святии;
Радуйтеся, сонме богоизбранный;
Радуйтеся, звезды земнии;
Радуйтеся, цветы прекраснии;
Радуйтеся, мученицы непорочнии, младенцы Вифлеемстии.
Кондак 3
Сила Всевышняго в немощи вашей явленная посрами сильных века сего, вас бо избившия жестоковийнии мучителие, Спасителя мира убити жестоковыйнии не возмогоша. Мы же за сие прославляем Бога пением: Аллилуия!
Икос 3
Имуще вас теплейших молитвенников и предстателей ко Господу усерднейших, восхваляем Творца Бога, вас же превозносим тако:
Радуйтеся, за Христа пострадавшии;
Радуйтеся, Ему ныне предстоящии;
Радуйтеся, со ангелы ликовствующии;
Радуйтеся о нас тепле молящиеся;
Радуйтеся, мученицы непорочнии, младенцы Вифлеемстии.
Кондак 4
Буря скорби постиже живущих в Вифлиеме Иудестем и во всех пределех его, они бо реки крови вашея зряще, в скорби велией взываху Богу: Аллилуия!
Икос 4
Слышаще словеса пророка яко глас в Раме слышан бысть, плач и рыдание и вопль мног: Рахиль плачущися чад своих, и не хотяще утешитися, яко не суть, тако глаголем:
Радуйтеся, лучи Солнца Правды;
Радуйтеся, пророчества Иеремиинаго исполнение;
Радуйтеся, родителие и сродницы оплакании;
Радуйтеся, Творцем мира утешении:
Радуйтеся, мученицы непорочнии, младенцы Вифлеемстии.
Кондак 5
Боготечныя звезды на тверди небесней блистающии, святии мученицы младенцы, помяните у Престола Господня всех чтущих память вашу и вопиющих о вас Богу: Аллилуия!
Икос 5
Видяще на земли новыя Ироды людей убивати своя чада во чреве понуждающия, возводим очи своя горе и просим помощи вашея, да избавите от пагубы сия всех глаголющих вам тако:
Радуйтеся, помощницы богодаровании;
Радуйтеся, заступницы скоропослушливии;
Радуйтеся, утешающии скорбныя;
Радуйтеся, утоляющии печальныя;
Радуйтеся, мученицы непорочнии, младенцы Вифлеемстии.
Кондак 6
Проповедницы младенческаго незлобия, святии мученицы Христовы, потребите молитвами вашими ожесточение сердец наших, да в чистоте сердца возносим молитвы Господеви, поя Ему: Аллилуия!
Икос 6
Возсия во всю землю слава страданий ваших, святии младенцы Вифлеемстии, от востока до запада вернии бо чтут святую память вашу и вопиют тако:
Радуйтеся, милосердия источницы;
Радуйтеся, любовию озаряющии;
Радуйтеся, мученическаго лика украшение;
Радуйтеся, земныя юдоли радование;
Радуйтеся, мученицы непорочнии, младенцы Вифлеемстии.
Кондак 7
Хотяще спасти души своя, прибегаем к теплому заступлению вашему, мученицы младенцы, да ходатайством вашим избегнем вечнаго мучения и сподобимся пети Богу песнь: Аллилуия!
Икос 7
Новых сотворите нас, младенцы святии, древняго зла избавивше. Да ревностно поработаем Господеви и воспеваем вам сия:
Радуйтеся, ликование праведных;
Радуйтеся, благоухание святыни;
Радуйтеся, животворнии источницы;
Радуйтеся, сосуди благодати;
Радуйтеся, мученицы непорочнии, младенцы Вифлеемстии.
Кондак 8
Странное чудо является всем притекающим к вашему заступлению, святии мученицы младенцы, многомощным бо предстательством от бед избавляете всех верно вопиющих Богу: Аллилуия!
Икос 8
Весь мир во зле пылаемый на верныя ополчишася, вы же предстатилие наши теплейшия от козней его избавити всех тако вопиющих во умилении вам сия:
Радуйтеся, наше ограждение от зла;
Радуйтеся, потребление вражеского коварства;
Радуйтеся, исцеляющии от злобы;
Радуйтеся, избавляющии от страстей;
Радуйтеся, мученицы непорочнии, младенцы Вифлеемстии.
Кондак 9
Всякое коварство демонов лукавых отжените от нас, святии мученицы младенцы. Мы же Вашими молитвами ограждаеми немолчно славословим Творца песнию: Аллилуия!
Икос 9
Ветия многовещании и тии не возмогут по достоянию изобразити небесную славу вашу, святии младенцы. За Рождшагося от Девы бо пострадавше, ныне Ему предстоите в молитвах своих воспоминающе всех чтущих вас сими словесы:
Радуйтеся, очищающия от скверны греховныя;
Радуйтеся, наставляющии богоугодному житию;
Радуйтеся, яко вами духовне возвеселяемся;
Радуйтеся, яко вами добре просвещаемся;
Радуйтеся, мученицы непорочнии, младенцы Вифлеемстии.
Кондак 10
Спасите от погибели, святии угодницы Христовы, отроки и отроковицы, греховными нравы растлеваемии, да навыкнут добродетелем и воспоют верно Творцу и Богу своему: Аллилуия!
Икос 10
Стеною молитв ваших оградите юноши и девы от растления греховнаго, умы их светом истины просвещающе, мы же тако вам вопием:
Радуйтеся, благоугодное услаждение;
Радуйтеся, мудростию напоение;
Радуйтеся, юных сердец защищение;
Радуйтеся, юных умов просвещение;
Радуйтеся, мученицы непорочнии, младенцы Вифлеемстии.
Кондак 11
Пение Пресвятей Троице со святыми и ангелы совершающе, помяните нас, угодницы святии, да купно с вами во веки будем восхваляти Господа песнию: Аллилуия!
Икос 11
Светозарнии камение драгии мученицы младенцы Вифлеемстии, на тверди небесней благодатию сияющии, восхваляем ныне вернии, тии бо молитвами своими от бед и скорбей избавляют всех, тако им зовущих:
Радуйтеся, Творцем увенчании;
Радуйтеся, ангелами прославляемии;
Радуйтеся, верными воспеваемии;
Радуйтеся, нами ныне ублажаемии;
Радуйтеся, мученицы непорочнии, младенцы Вифлеемстии.
Кондак 12
Благодатное воинство, в земней юдоли сущих от козней духов нечистых ограждаемии, ныне зрим вас, мученицы младенцы, в радости о сем благодаряще Бога ангельскою песнию: Аллилуия!
Икос 12
Поюще вам песни похвальнии, мним вас быти заступники нашими, да не порадуется сила бесовская о погибели тех, иже с верою и любовию тако вам во умилении вопиют:
Радуйтеся, матерей детородящих покровители;
Радуйтеся, младенцев от бед оградители;
Радуйтеся, яко вами Имя Божие прославляется;
Радуйтеся, яко вами райстии обители украшаются;
Радуйтеся, мученицы непорочнии, младенцы Вифлеемстии.
Кондак 13
О, святии младенцы мученицы, явите милость свою на всех, иже верою и любовию чтут святую память вашу и вопиют верно о вас Богу: Аллилуия!
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангельский собор земных ангелов зряще, младенческим незлобием злобу демонскую, чрез Ирода явленную, победивший, умиляемся сердцем, таковая им воспевающе:
Радуйтеся, ангели юдоли земныя:
Радуйтеся, бисери Рождества Христова;
Радуйтеся, зерцала непорочности;
Радуйтеся, благоухание незлобия;
Радуйтеся, мученицы непорочнии, младенцы Вифлеемстии.
Кондак 1
Избранный соборе мучеников, во младенчестве за Христа пострадавшие, молитися усердно о чтущих святую память вашу и тако вам с любовию вопиющих:
Радуйтеся, мученицы непорочнии, младенцы Вифлеемстии.
Молитва
О, святии мученицы, младенцы Вифлеемстии, ублажаем ныне страдания ваши, за Рождшагося от Девы понесеннии, славословим чистоту душ ваших, юже ко Престолу Господню, яко жертву благоуханную принесли есте, воспеваем небесную славу вашу, еюже райстии обители озаряете. О, святии младенцы, призрите с небесныя высоты на мужи и жены, во гресех потопляемии, на юноши и девы, смрадом греховным растлеваемии, на отроки и отроковицы, мерзостем греховным научаемии, на младенцы, родительми оставлении и во утробах еще сущих, ко убиению приуготовлении. Вознесите молебный вопль ваш ко Престолу Христа Бога, Его же ради во младенчестве убиение от Ирода нечестиваго претерпели есте, да помилует всех Рождшийся от Девы и от погибели вечныя избавит, младенцы же, во утробах сущих, от убиения да избавит.
Вемы бо вемы, угодницы Христовы преславнии, яко многомощна молитва ваша пред Богом, сего ради, уповающе на милость и любовь вашу, прибегаем ко многомощному предстательству вашему и просим не оставити нас в гресех погибающих. Приведите молитвами своими всех нас ко богоугодному житию и сподобите в будущей жизни небесного наслаждения и райских обителей, идеже вечно воспевается Имя Пресвятыя Троицы, Отца и Сына, и Святаго Духа. Аминь.
Канон
Пе́снь 1.
Ирмо́с: Предели́в пучи́ну чермну́ю Бо́г, фарао́на погрузи́вый в не́й, прове́д Моисе́я немо́кренно в пусты́ню и одожди́в ма́нну в сне́дь лю́дем Изра́илевым, я́ко си́лен.
Звезда́ возсия́ в Вифлее́ме и Еде́ма от мра́чныя разреши́ кля́твы, и спасе́ния де́нь да́руется родонача́льником, из де́вственна о́блака просия́вый Иису́с, су́щих во тме́ просвеще́ние.
Три́знище дне́сь младе́нцев отве́рзеся ве́рным за Христа́ и Бо́га, враго́в облича́я нача́ла и вла́сти и И́родов облича́я му́жески младоу́мный гне́в смы́сленно.
Богоро́дичен: Боже́ственное утвержде́ние и стена́ неруши́ма, Чи́стая, и мы́сленный мо́ст при́сно, и необори́мь сто́лп, и основа́ние, и покро́в, его́же ра́ди спаса́емся вси́ от бе́д — Ты́ еси́ вои́стинну.
Пе́снь 3.
Ирмо́с: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́, я́ко не́сть свя́т, я́ко Ты́, Бо́же на́ш.
Де́вственною две́рию проше́д, Соде́тель и Бо́г на́ш плотски́й до́м Себе́ созда́ неизглаго́ланно, и Младе́нец бы́сть, и во я́слех восклони́ся.
Све́рстницы, де́ти — страда́льцы Христо́ва воплоще́ния, И́родово неразу́мное ослепи́ша неи́стовство и о́чи всесве́тлии Це́ркве яви́шася.
Богоро́дичен: Из Тебе́ безо́тчий яви́ся, безма́терен пре́жде веко́в Госпо́дь, и зи́ждется преесте́ственно, и назда́ние да́рует су́щим из Ада́ма обоже́ния, Де́во Неискусобра́чная.
Седа́лен, гла́с 4.
Ро́ждшемуся дне́сь от Де́вы младе́нцев во́инство я́ко Творцу́ и Царю́ прия́тная прино́сятся заколе́ния, предложе́нная Христу́ ве́ры ра́ди.
Сла́ва, и ны́не: Удиви́ся, уве́дев, И́род, ца́рь лю́тый, ища́ я́ростию, проти́ву боря́ ро́ждшемуся на земли́ Царю́, ю́ному Христу́, и, боя́знию и стра́хом мно́гим содержи́мь, посыла́ет во́инство уби́ти с я́ростию де́ти, в Вифлее́ме младе́нствующия, ку́пно с ни́ми уби́ти покуша́яся Созда́теля, за благоутро́бие обнища́вшаго: из де́вственныя бо утро́бы произы́де, спасти́ хотя́ ро́д на́ш.
Пе́снь 4.
Ирмо́с: Услы́шах слу́х Тво́й и убоя́хся, проро́к глаго́лаше, разуме́х дела́ Твоя́, и диви́хся, и возопи́х: сла́ва си́ле Твое́й, Го́споди.
Де́ва и не́бо, небе́сныя и земны́я, Рождество́м хода́тайствовавши, па́че ума́ примири́ и вражды́ средосте́ние разори́.
Младе́нец мно́жество му́ченически, по Бо́зе все́х пострада́вше, по́чести страда́ния от Него́ прие́млет: и́хже ра́ди И́род весьма́ устыде́ся.
Богоро́дичен: Боже́ственное Сло́во во утро́бе заче́нши, стра́шным Сло́вом па́че сло́ва породила́ еси́ пло́тию, Всенепоро́чная, те́мже Тя́, Богоро́дицу, сла́вим.
Пе́снь 5.
Ирмо́с: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.
Чу́вственное у́бо со́лнце о́блаки покрыва́ется, У́мное же и Всеневеще́ственное, безме́рным благоутро́бием в пло́ть оде́явся, в верте́пе дне́сь пелена́ми повива́ется на́с ра́ди.
Скверноуби́йства кровьми́ И́род оскверня́ется: Влады́ку бо все́х, Бо́га и Царя́, уби́ти покуша́яся, на о́троки неи́стовствует и свире́пствует лю́те.
Богоро́дичен: Заре́ю моли́твы Твоея́, Богороди́тельнице Чи́стая, слепоту́ се́рдца моего́ озари́, я́ко еди́на свети́льника Го́спода и сла́вы со́лнце возсия́вши Христа́.
Пе́снь 6.
Ирмо́с: Бу́ря мя́ мно́гих согреше́ний мои́х потопля́ет, и изнемога́ет ду́х мо́й; но Ты́, Го́споди, я́ко ми́лостив, сше́д, возведи́ живо́т мо́й.
Боже́ственное воплоще́ния Сло́ва соверша́ется дне́сь та́инство, Богоро́дице: Тобо́ю бо яви́ся пло́тию Бо́г Преве́чный, да обожи́т прия́тие.
Рахи́ль, у́бо ча́д пла́чущи, дре́вле провозвести́ за Христа́ младе́нцев, прие́мших безго́дное заколе́ние; те́м и отрица́шеся, уте́шитися не хотя́щи.
Богоро́дичен: Боже́ственное Рождество́ Твое́, Всесвята́я, прозя́бшую пресече́ в раи́ кля́тву и, стезю́ дре́ва жи́зни челове́ком отве́рзши, благослове́ние источи́.
Конда́к, гла́с 4.
Звезда́ волхвы́ посла́ к Ро́ждшемуся, и И́род непра́ведное во́инство посла́ лю́то, уби́ти мня́ во я́слех я́ко Младе́нца лежа́ща.
Пе́снь 7.
Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Весели́тся дне́сь Вифлее́м с на́ми, Тя́ бо, Невмести́маго, в верте́пе прие́млет, — благослове́н еси́, — вопия́, — еди́н Бо́г оте́ц на́ших.
Незло́бива же́ртва и нескве́рная за Тя́ предзакала́ется, Бо́жий Сло́ве, вопию́ще: благослове́н еси́, Го́споди, Бо́же оте́ц на́ших.
Богоро́дичен: Ра́дуйся, небу́рное покая́ния приста́нище, в не́же прибега́юще, Богоро́дице, зове́м: благослове́на еси́ Еди́на, ро́ждшая Бо́га оте́ц на́ших.
Пе́снь 8.
Ирмо́с: Вся́ческая, Влады́ко, прему́дростию Твое́ю соста́вил еси́, земли́ же па́ки утверди́л еси́, я́коже ве́си, дно́, основа́нием водрузи́вый на вода́х безме́рных. Те́м вси́ вопие́м, воспева́юще: благослови́те, дела́ Госпо́дня, непреста́нно Го́спода.
А́нгели сла́вят вла́сть Ро́ждшагося, па́стырие чудя́тся, и волсви́ покланя́ются, небеса́ возвеща́ют звездо́ю Зижди́теля; с ни́миже вси́, воспева́юще, вопие́м: благослови́те, дела́ Госпо́дня, Го́спода.
Мно́жество неискусозло́бное во́инствует Влады́це дне́сь кро́вию и на И́рода тве́рдо вооружа́ется, Тебе́, Христе́, ро́ждшуся. Те́м вси́ вопие́м, воспева́юще: благослови́те, дела́ Госпо́дня, Го́спода.
Богоро́дичен: Де́ву Тя́, Чи́стая, хра́м, и две́рь, и о́блак, купину́ неопали́му, и ста́мну ма́нны, и же́зл прозя́бший, киво́т, и све́щник, и скрижа́ли заве́та, го́ру святу́ю, из нея́же ка́мень отсече́ся, проро́цы Бо́жии пропове́даша.
Пе́снь 9.
Ирмо́с: Я́ко сотвори́ Мне́ вели́чие Си́льный и свя́то и́мя Его́, и ми́лость Его́ в ро́д и ро́д боя́щимся Его́.
Ве́сь в Тебе́ вмеща́ется, И́же в не́дрех сы́й Отца́, и зи́ждется Зижди́тель небесе́, и истощава́ется мене́ ра́ди, и, в пелена́х пови́вся, разреша́ет прегреше́ний плени́цы.
В Ра́ме слы́шася Рахи́ли го́рькое рыда́ние, пла́чь же, и увы́, и сокруше́ние: скверноуби́йца бо вра́г, на ча́да Вифлее́мская, И́род показа́ся.
Богоро́дичен: Рождество́м Твои́м, Де́во, обожи́хомся, сме́ртнии: Бо́га бо, Пита́теля все́х и единосла́вна Отцу́, и ражда́еши, и млеко́м пита́еши. О, стра́ннаго чудесе́!
Свети́лен.
Зла́чную ни́ву младе́нец, богобо́рствуя И́род, посла́в, незре́лую пожа́, окая́нный, и, ро́ждшагося Го́спода не возмо́г уби́ти, вся́каго сра́ма исполня́ется.